VI. Koleksi Pantun

 

1.

Asam pauh dalima pauh

Rama-rama batali banang

Ading jauh kaka gin jauh

Sama-sama pada mangganang

 

2.

Jarang-jarangnya kita mamantat

Halat hitungan si dua jari

Jarang-jarangnya kita badapat

Halat sabulan di dua hari

 

3.

Tinggi gunung sikaramaian

Kulihat kapal jauh balabuh

Manangis badan kasunyian

Banyu mata kahada taduh

 

4.

Liwat jalan ka Lianganggang

Manyusur simpang ka Bati-Bati

Napa untung diriku saurang

Bakula kahada marista diri

 

5.

Matan Kandangan ka Gunung Madang

Banyak tumbuh puhun rumbia

Jauh madam ka banua urang

Diri jauh bakula kahada

 

6.

Asam pauh delima pauh
Ka dukuh manukui buah durian
Biar ja pian jauh ulun jauh
Tapi hati ulun tatap gasan pian

 

7.

Buah kurma di dalam peti
Jangan lupa aku dibari
Kita bapantun mahibur diri
Pantun Banjar tatap lestari

 

8.

Apa ditukar tulak ka pakan
Kanas anum ditukar Diang
Si Diang rancak bapapencokan
Labar cagar batianan pulang

 

9.

Hari ini ka pasar jumahat
Kahujanan di tangah lurung
Burit aluh sasar taangkat
Kajadian parut bagambung

 

10.

Hari ini  hari jumahat

Urang tulakan kamasjitan

Amun diri suka ibadat

Anugrah Allah kamuliaan

 

11

Suara suling kalah wan sarunai
Sarunai ditiup wayah bakuntaw
Mamagut ading sambil manjapai,
Tasalah japai labaram mantapaw

12.

Buah kasturi tanam babaris
Hamburi pupuk supaya subur
Wajah ading talihat manis
Saban hari maambun pupur

13.
Warnanya kuning tanda karamat
Amun hirang artinya latat
Kurihing ading sanyum tasirat
Tabayang-bayang  satiap saat

 

14.

Tadangar mardu suara suling,
Mata nang rait balalu guring,
Kaka guring mamagut gaguling
Asa mamagut awak si ading

 

15.

Buah nangka buahnya labat
Dibalah-balah dikarat-karat
Mata bapijim  tarasa barat,
Taganang ading batahi lalat

 

16.

Pisang anum dibalah dua
Sabalahnya buat ka lanjung
Amun makan tarasa hanta
Kakuweh hikau mananjung

 

17.

Buah tiwadak dijajak linyak

Utuh kaciput tarung babanam
Hahalulung papar kuciak

Bisul marantan dipatuk hayam

 

18.

Buah mingkudu dalam cupikan
Tatamba urang nang tinggi darah
Katuju manggawi larangan tuhan
Naraka jahanam dibari Allah

 

19.

Ka Kandangan banaik rakit
Ka Barabai naik sapida
Sakit parut pina malilit
Handak ka jamban ada urangnya

 

20

hujan matan baisukan lacit kamarian
jamuran ba al kada sing karingn
panimburuan jangan pina kalimpatan
kalu laki bawa kapangadilan basarakan

 

21.
Wadah sapatu dadampar wasi
Wasi di tata kaya karanjang
Sudah ampat baisian bini
Pina layau bagandakan pulang

22.

Nasi samin di atas ancak
Nyaman-nyamanya kalu dimakan
Kaya apa juduh handak baparak
Amun hidup jadi pangangguran

 

23.

Iwak bulanak diulah wadi
Banyaki uyah lalu dipaja
Siapa hakun basakit diri
Halinai kalah dinasib haja

24.

Kiak-kiak si anak ayam
Matan tadi inya kuciakan
Pina tumbur di tangah malam
Sakalinya aluh barungkupan

 

25.

Ungut-ungutan burung pipikau
Takana pulut di puhun rambai
Pina mangaruh guring malandau
Liur basi lilih ka lantai

 

26.

Amparan tatak pisang manurun
Jangan di andak di atas upih
Gulang galik di tikar purun
Imbah tajungging talului tapih

 

27.

Tarabang burung si kalayangan

Anaklah dandang tarbang manari

Bahalat gunung lawan kayangan

Apalah handak datang kamari

 

28.

Iwak rabuk iwak haruan
Pasanan urang nang batianan
Pina rami urang kasaruan
Nanang wan galuh dinikahakan

 

29.

Napang itu si kambang goyang

Kambang nang ada dipangantinan

Gara-gara manjujur diyang

Habis tajual kabun kuitan

 

30.

Tulak ka kuta nukar guguling
Kada tatinggal nukar bantalnya
Kaya apa mata handak taguring
Amun batis bini kalihatan paha

 

31.

Ka Sungkai manukar pisang
Ka Barabai manukar apam
Umai hati marasa pusang.
Muha Galuh pina mambantam

 

32.

Tulak ka pasar jalan bainggang
Nukar gaguduh tapi bahutang
Kulang kisar di atas ranjang
Mikirakan juduh kada jua datang

 

33.

Amas mirah intan sakarat.
Kapal di laut gedong di darat.
Mambuka pander pina harat.
Tapih bakarut baju bajarat.

 

34.

Kapal di laut gedong di darat
Tulak bajukung ka pasar hanyar
Membuka pander  pinalah harat
Hutang bahambur kada tabayar

 

35.

Amun tahu ketupat Kandangan
Padahiakan apa iwaknya
Amun tahu ulun  karindangan
Lakasi tulung napa ubatnya .

 

36.

Rumah hanyar batawing halat
Andaki watun jangan ka buncu
Malam ini malam jumahat
Lakasi ading luruh kalambu

37.
Buah kuini buah hampalam
Amun dipancuk saling nyamanan
Saharian hujan lacit  kamalam
Awak dingin nyaman balukupan

 

38.

Pisang raja pisang amas
Cari di pasar labuan amas
Kasih uma kada ba watas
Sayang abah kada ba tikas

39.

Matan gambut ka tatah bangkal
Maunjun papuyu lawan haruan
Matan parut sampai ka ganal
Doa kuitan kada sing pagatan

40.
Bungaslah hati bungaslah rupa
Saharum kambang si sadap malam
Jadi anak sholeh wan sholeha
Doa kuitan siang wan malam

41.

Anak warik anak hirangan
Naik ka puhun mancari makan
Anak baiman babakti wan kuitan
Itulah anak kakasih tuhan

42.
Handak manukar pancarakinan
Banyak dijual urang di pasar lima
Ridha umalah ridhanya Tuhan
Adanya surga di talapak batis uma

43.
Bismillah kata barmula
Alhamdulillah panutup do'a
Mun madam sampai niatnya

Kada pang lupa lawan banua

 

44.

Nyaman-nyamannya mamakan baksu
Habis samangkuk samangkuk pulang
Nyaman-nyamannya  babini balu
Imbah nang balu nang bujang pulang

 

45.

Daun karing kalaras pisang
Disalukut lakas banyala
Si Galuh mambibit parang

Malihat laki lawan gandaknya

 

46.

Gangan waluh karuk bilungka

Lauk makannya iwak haruan

Saling nyaringan Utuh tatawa
Malihat galuh babirangkangan

 

47.

Waluh kuning bahapat-hapat
Bilungka hapuk halus biginya
Jangan talalu jadi pajabat
Kalu masuk rumah sakit jiwa

 

48.

Nyaman banar duduk di kindai
Kindai puang hadang kataman
Nyaman banar duduk batatai
Lawan  si ading bakal suntingan

 

49.

Lihum di kulum bibir bagincu

Pipi licin maambun pupur

Rasa sigar lawas kada batamu

Apa habar di Kualalumpur

 

50.

Lihum di bibir aduhai sayang

Rambut mamak mayang maurai

Niat di hati aduhai sayang

Nasiblah jua baluman sampai

 

51

Amaslah  pirak amaslah suasa

Dikamas utas batatah parmata

Janganlah lupa adat pusaka

Lastariakan pantun Banjar kita

 

52.

Pucuk gumbili pucuk kastela
Diurap lawan kambang tigarun
Amun handak hidup babahagia
Jangan lupa papadah turun timurun

 

53

Malam ini malam Jumahat
Malam apdal hagan mahaluat
Sumbahyang mangaji wan salawat
Itulah amal salamat dunia ahirat

 

54
Robbanaghfir lii wa lii waalidayya

wa lilmu’miniina yawma yaquumul hisaab

Peliharalah kadua ibu bapaku ya maha

Sekalian saudaraku mukmin bila terjadinya hisab

 

55

Pilanduk bukah di tangah hutan
Tajajak jipah batisnya timpang
Batunduk iyang pura-pura supan
Talihat tapih utuh lului tatilanjang

56

Asam pauh asam balahan
Rama-rama batali banang
Panimburuan bumbu pacaran
Tandanya kasih wan sayang

 

57

Asam pauh asam balahan
Balimbing tunjuk masak sabigi

Amun liwar panimburuan

Kada baik jua marusak hati

 

58

Tipisnya tipis kain kakamban

Tipisnya lagi kulibir bawang
Lakinya lawas mancari kidaman

Sawat titik liurnya mahadang

59
Tulak kabaruh baulah ladang
Makan nasi habis saparing
Gulang galik di atas ranjang
Mata ngantuk kada taguring

60

Lading diasah supaya tajam
Hagan maraut bilahan lidi
Lamun mata kada tapajam
Tiwas ja banyak maminum kupi

 

61

Baguna hidup marga baadat
Adat tutuha jadi pakaian
Sampurna hidup marga syahadat
Syahadat dijaga manguatakan iman

62
Adat mati dikandung tanah
Dunia wan harta pasti tatinggal
Salamat mati mangandung ibadah
Sangunya nintu banyak baamal

63
Adat urang bajalan malam
Pakai suluh jadi paduman
Adat urang baagama Islam
Ada patunjuk manarangi iman

64
Urang bajilbab manutup aurat
Sasuai lawan patuah hadis
Urang muslimah hidup ba'adat
Piragal baik muhanya manis

65
Siapa kuat maingkut iman
Hidup matinya kadalah sasat
Siapa baiman salain Tuhan
Dunia akhirat pacangan sasat

66
Siapa bajalan di jalan Tuhan
Kamana batulak awak salamat
Siapa amanah dalam kabanaran
Iman tajaga dunia akhirat

67
Baiknya adat marga dikaji
Baiknya kaji marga sunnah
Baiknya umat marga babudi
Baiknya budi marga Allah

68
Baiknya budi marga ikhlas
Baiknya gawi marga niat
Baiknya kaji marga dibahas
Baiknya manusia marga syariat

69
Baiknya batis kawa malangkah
Baiknya batis kawa bajajak
Baiknya hati maingat Allah
Baiknya iman tambah batajak

70
Lamun handak mancari kawan
Cari sampai ka luang kubur
Lamun handak mancari Tuhan
Kanal diri banyak tafakur

71

Jalan ka pasar mamakai salup
Handak manukar si ubat nyamuk
Bukah mancicing wan tajarungkup
Disasah sapi lagi mahamuk

72
Habang hijau buah rambutan
Si antalagi manis rasanya
Awak manggaring marga dandaman
Tabayang-bayang lawan rupanya

73

Saputangan jangan dirabit

Imbah dirabit jangan dibuang

Lamun dandaman jangan diarit

Capat batamuan kaina miyang

 

74

Kaliyangan madandang rakun
Lumbar piluntang juhut banangnya
Diulah gandak jangan hakun
Kaina dirungkup lawan bininya

75

Aku handak bapapatuhan
Lawan si anak patuha Sultan
Aku handak batatangguhan
Lawan dangsanak sabarataan

.
76
Bilatuk burung bilatuk

Batinggir di kayu jabuk
Mataku sudah mangantuk

Bawa guring basindukut

77

Kitik-kitik  daun rumbia.
Daunnya balik tilantang.
Apik-apik dalam dunia.
Pintu naraka sudah mahadang.

 

78

Umailah tajam lading belati
Mangupas mangga masak dipuhun
Umailah pantun marasuk hati
Marasuk hati badindang ligun

 

79

Hintalu dadar si mata sapi
Wadahnya piring bakambang
Pina balangsar mun handak mati
Salagi hidup kada sumbahyang

80

Ka kabun mamutik nangka
Nangka diputik buat ka jukung
Jauhakan bala masuk naraka
Musti rajin kita sumbhyang

81

Pancuk mangga wan uyah wadi
Campuriakan wan asam cuka
Salagi hidup baiingat diri
Sasal kamudian kada baguna

82

Hirang-hirang buah kasturi.
Mun dimakan nyaman rasanya.
Niscaya hidup kada marugi

Asal jalannya jalan agama

 

83

Nyaman banar mamakan lamang
Dicacapakan kasambal kacang
Parcuma haja panyambahyang
Lamun gawian mawadai urang

 

84

Allah itu Maha Penyayang
Disebut jua Rabbul Izzati
Ampun diri kada sambahyang
Kaya apa kena sasudah mati

 

85

Likitakan lampu nang pajah

Andakalan ka tangah rumah

Rahman dan Rahim Sifatlah Allah
Untung batuah mandapat barkah

 

86

Jauh bajalan naik sapida

Puruk sandal baju kamija

Bila badusa masuk naraka
Nauzubillah jauhkan bala

87

Lawan patuah musti dipilah,
Ambil bujur buang nang salah,
Gawian nitu gawian manyalah
Mun digawi kada bapaidah

 

88

Warik halus ngarannya kaliawat
Amun garing lakasi kinumi ubat
Jangan lalay maninggalakan solat
Dilangkapi lawan amalan sunat

 

89

Tulak bagarit ka dalam hutan

Manggariti kijang minjangan

Urang islam janganlah umpatan

Menyambut tahun baru baririaan

 

90

Ada di puhun burung karuang

Mamakan pisang tunggal patukan

Ujar urang umur batambah panjang

Padahal  baparak luang kuburan

 

91

Saharian ka pahumaan

Pahumaan tagah wan rumput

Mun ingat mati liwar takutan

Tinggalakan gawi maksiat

 

92

Bajiarah ka kubur karamat.
Naik kalotok atawa parahu
Ujar urang 2012 hari kiamat.
Rasia Allah siapa nang tahu!

.

93

Maramu rarampah gasanlah ubat

Ubat dminum diwaktu malam

Ujar nabi hari kiamat hari jumahat

10 muharram tahunnya wallahu a'lam

 

94

Sandal gapit sandal tilasan

Sandalnya murah lima ribuan

Di dunia talalu bararamian

Kaina mati di kubur kasunyian

 

95

Batang mingkudu jangan di patah
Buahnya tatamba urang jantungan
Napa rancak banar lastrik pajah
Manyuap nasi taigut tangan

96

Manis manisnya si buah jambu
Gugur sabigi bunyi mandabuk
Marga tabuka buncu kalambu
Balisah guring disangat nyamuk

 

97

Gangan haliling gangan balamak

Santannya likat kulapa gading

Kaya apa handak guring janak

Imbah mambaca surat si ading

98

Layar diurak layar dibantang
Tulak balayar ka pulau Bali
Bibir tipis bagincu habang
Takarinyum manarik hati

 

99

Buah nangka balah wan parang
Biginya nyaman kalu dijarang
Lawas banar mahadang-hadang
Sakalinya disalungkar urang

 

100

Batalimpoh simpun di lantai
Mandangarakan patuah uma
Awak langsing tingggi samampai,
Rambut basunting kambang kananga